على ذاك الطريق اللي يسمونه غرام احباب - - - وطت رجلي على دربة ولا ادري وش نوى فيني
تبعته لآخر دروبة إلين القمر قد غاب - - - تعب قلبي ولا تعبت مسافاتن توديني
لقية الليلة الجردا هدب وظل وسما واعشاب - - - بعد ذاك الظلام اللي يتوهني عناويني
صدفتك معجبة فيني وياليت الغرام اعجاب - - - وتراكي انتي الهنوف اللي هقيتك تستحقيني
عطيتك عشق من قلبي وسلمت لغلاك ارقاب - - - وغيرك يحترق قلبة ولا يقدر يحاكيني
انا قبلك صدفت عيون لكن ويش جاب لجاب - - - ترى كل العيون اللي لقتني ماتكفيني
رماني حظي العاثر عليك وجيتلك طلّاب - - - ولا انتي اللي عشقتيني ولا انتي اللي عتقتيني
تعالي ارحمي ذاك الخفوق المولع المرتاب - - - مو لاجلي عشان الله يجازيك ويجازيني
تعدي في سما عشقي ولو عشقي خراب اصحاب - - - وصوني بالهوى نفسك قبل انتي تصونيني
وشيليني على متنك خفوقين بارين منصاب - - - ومن فوق الغرام العذب شيليني وحطيني
ولي منك هقيتيني شجاع وما يطيق يهاب - - - انا لك بالهوى والله مثل ماانتي هقيتيني
انا ممشي ورى غيرك ولو انه يطق الباب - - - وترى عيبن علي اطعن ولو كثرت سكاكيني
زهودن مايطيق الدم لا داين ولا طلاب - - - شجاع وعارفن نفسي واظن انك تعرفيني
غيور ماعرفت اضحك مع الغدر ابرود اعصاب - - - ابيع عيوني الثنتين قبل انك تخونيني
وذا شد الغرام احط قلبي بين ناب وناب - - - الفرقا تكسر ضلوعي ولا عشقن يوطيني
انا رجل ولي غيرة واذا شفت الهوى كذاب - - - تثور في قلبي الفزعة ولا تهدى شياطيني
سؤالك لو يزعزعبي كياني ماقبلت اعتاب - - - اجيلك واسئلك نفس السؤال اللي سئلتيني
عن العشق القديم ابوابك فيها كثير ابواب - - - بعد ذاك الحبيب اللي خدعني وانخدع فيني
ابي عشقن تحسبله كل نظرات العيون حساب - - - وابي قلبن على قلبي وابي دينن على ديني
وابي كلمة عهد توفي ولا تخلف بدون اسباب - - - وابي منك قبل لا انتي تصديني توديني
وابي دربن على العذال صعب ومتعب وغلاب - - - وابي نفس الطريق الصعب يبعدهم ويدنيني
ترى لو القلوب عيون ودموع العيون اهداب - - - حشى ماتنزل الدمعة لغيرك لو تركتيني
انا اول من عرف قدرك وانا توي صغير وشاب - - - وابي منك مادام انك عرفتيني تحبيني
مدام اني لقيتك في طريق اسمة غرام احباب - - - دخيل الله ومن بعد الله دخيلك لا تخليني
مدام كل من يحيى على وجة التراب تراب - - - عسى تنساني الدنيا مدام انتي ...ذكرتيني